کۆڵن/ ئاڵمان : خۆپیشاندانەکانی یەکی ئایاری 2012

کۆڵن/ ئاڵمان : خۆپیشاندانەکانی یەکی ئایاری 2012

ئەم ساڵ بەپێچەوانەی سالانی پێشوو، گروپە ئەنارکیستەکان چەند مانگ پێشتر هاوپەیمانییەکان لە گشت گروپەکان و تاکە ئازادیخوازەکان پێكهێنا؛ لەوانە یەکێتی ئازادی کرێکاران-کۆڵن، سەندیکای ئەنارکیستی لاوانی کۆڵن، ڕێکخراوی بێکارانی شاری کۆڵن، فۆرومی ئەنارکیستانی شاری کۆڵن و چەندین کەسی دیکەی ناڕێکخراوی ئەنارکیست لە پەنابەران (ولاتانی دی) و شارەکانی دیکەی ئاڵمانەوە بەشدارییان تێدا کرد.

ئامادەکاری 1ی ئایاری ئەم ساڵ بێجگە لە کۆبوونەوەی بەردەوامی هەفتانە، چەندین چالاکی دیکەی گرتبووە خۆ، لەوانە ئێوارە کۆڕ لەسەر مێژووی یەکی ئایار و دیوە شاراوەکانی ئەو مێژووە، ئێوارە سینەما بە نیشاندانی فیلمی دۆکومێنتەری لەو بارەوە و وۆرکشۆپ و یاداوەی قوربانیانی کار و ڕێپێوان بەو بۆنەوە لە 28ی ئەپڕیڵی 2012 بەناو چەند ویستگەیەکی شاری کۆڵن دا و چەند ئێوارە میتینگ و جەژنی هاوپشتی و هەندێك چالاکی دیکە، لە ماوەی چەند مانگدا بەرپاکران.

بەشداری ڕێپێوانی 1ی ئایاری 2012 **

ئەم ساڵێش وەك چەند ساڵی پێشوو، ئەنارکیستەکان وەك ڕیزبەندییەك (بلۆکێك)ی ئەنارکی، لە ڕێپێوانی فەرمی یەکی ئایاری ئەم ساڵدا بەشدارییان کرد و هەژماری بەشداربووان لەچاو سالانی پێشوو، هەم لە ڕیزبەندی ئەنارکییەکاندا ڕوو لە زیادبوون بوو و هەم لە ڕیپێوانە گشتییەکەدا هەژماری بەشداربووان زۆرتر بوو.

ڕیزبەندیی ئەنارکی نێو ڕێپێوانەکە فرە ڕەنگ و دەنگ بوو؛ ئەندامانی یەکێتی ئازادی کرێکاران- کۆڵن، ڕێکخراوی بێکارانی شاری کۆڵن، سەندیکای ئەنارکیستی لاوان کۆڵن، ئەنارکۆ- فێمینیستەکان، ئەنارکۆ-کۆمونیستەکان، ئەنارکۆ- سەوزەکان و ئەنارکۆ-تاکگەراکان لە زۆر ولات و نەتەوەوە (پەنابەران و کۆچەران) هاتبوون و بەشدارییان کرد و لە کۆتایی ڕێپێوانەکەدا لە دەوری چادری راگەیاندنی ڕێکخراوی بێکاران و وێنەگرانی ئازاد و کرێکاری کۆبوونەوە و تا کۆتایی کۆبوونەوە جەماوەرییەکە مانەوە و بە درێژایی ڕێپێوان و کۆبوونەوەکە بە دروشمی ئازادیخوازانە و سۆشیالیستانە رامیاریی دەوڵەت و سەرمایەدارەکان و کۆنفیدراڵی یەکێتییەکانی ئاڵمان (DGB)یان ڕسواکرد, لە کاتێکدا پارت و ڕێکخراوە دەسەلاتخواز و ڕیفۆرمیستەکان تەپل و زوڕنا و گۆرانی و دروشمی ڕیاکارانەیان دەکوتا و دەوتەوە، بەردەوام دروشمەکانی ئەنارکیستەکان دژی ناسیونالیزم و دژی دەوڵەت و دژی سەرمایەداری و دژ یەکێتییە زەردەکان و بانگەوازی هاوپشتی نێونەتەوەیی گەرمییان بە ڕێپیوانەکە دەدا، لەوانە: «سەد ساڵ تەمەنی (DGB)، هیچ زیانی بە سەرمایەداری نەگەیاندووە» ، «بژی هاوپشتی دژەنەتەوەیی» ، ئەمانە و کۆمەلێك دروشمی دیکەی پەیوەست بە باری گوزەران و نەبوونی کار و پەرەسەندنەوەی نیۆنازییەکان و … هی دیکە .

** شایانی باسە زۆرێك لە چالاکانی ڕیزبەندیی ڕەش و سوور، لەم شارەوە چووبوون بۆ شاری بۆن بۆ بەرەنگاریی ڕێپوانی نیۆنازییەکان لە یەکی ئایاری ئەم ساڵی ئەو شارەدا…

Advertisements

خۆپیشاندانی ئامادەکاریی ئایار لە 30ی ئەپڕیڵی 2012

خۆپیشاندانی ئامادەکاریی ئایار لە 30ی ئەپڕیڵی 2012

ئێوارەی 30ی ئەپڕیڵی 2012 لە کاتێکدا ڕێپیوانی ئایاریی بە بڕیزبەندییەکی ڕەش و کۆمەلێك لافیتە و ئاڵای ڕەش و سوور و بڵندگۆوە بەبەردەم بنکەی پۆلیسی گەڕەکی (ئێرنفێڵد)دا تێدەپەڕین، لەلایەن هێزەکانی پۆلیسەوە هێرشیان دەکرێتە سەر و سەرەنجام پاش بریندارکردنی 2 خۆپیشاندەر و دەستگیرکردنی 10 کەسی دیکە، دەکەونە بەر ڕاونان و گرتنی خۆپیشاندەران.

لە دەستپێکەوە هەژماری خۆپیشاندەران نزیکەی 70 کەسێك بوو و بەرە بەرە ڕێبوارانی سەرشەقامەکان پەیوەست دەبوون یا بە دەستهەڵبڕین و دەنگهەڵبڕین و فیکە لێدان، پشتیوانی خۆیان دەنواند. زۆربەی خۆپیشاندەران کەسانی لاو بوون یەکێك لە دەستگیرکراوەکان، لەبەرئەوەی شوناسنامەی پێ نەبوو، یەکسەر پاش لێکۆڵینەوەی کەسیی، لەتەك 9 کەسەکەی دیکە ئازاد نەکرا و یەکێك لە بریندارەکان، کە ژنێكی لاو بوو، برینەکەی سەخت بوو، لەبەرئەوەی هێزەکانی پۆلیس سەریان بە دیواردا کوتابوو، هەردوو بریندارەکە گوازرانەوە بۆ خەستەخانە، بەشی فریاگوزاری.

سەرچاوەی هەواڵ : https://secure.flickr.com/photos/strassenstriche/sets/72157629570714048/