هاوپشتی لەتەک دانیشتووانانی ڕۆژاوا، ڕسواکردنی دەوڵەتی تورکیە و هاوپەیمانەکانی دەوڵەتی ئەمەریکا

ئەزموونوەرنەگرتن لە مێژوو، دووبارەبوونەوەی مێژووی شکستەکان بەرەنجامی دەبێت، بەڵام وەک گاڵتەجاڕییەک! ئەوەی لەم ساتە لە ڕۆژاوا ڕوودەدات، ڕێک ئەوەیە؛ سەرباری شکشتی پارتییەکانی کوردایەتی و بزووتنەوەی چەکداریی کوردان 19611975 لە کوردستانی بەشی عیراق بەهۆی هاوپەیمانی لەتەک دەوڵەتی ئەمەریکا و هاوپەیمانە ناوچەییەکانی، پاش چل ساڵ لە ئەزموونگیری گەلان لە گەمە ڕامیارییەکانی دەوڵەتی ئەمەریکا، کەچی پارتییەکی دیکە لە ڕۆژاوا دەکەوێتەوە هاوپەیمانی لەتەک دەوڵەتی ئەمەریکا و لاوانێکی گیانفیدای ئازادیخواز کە لە جەنگی کۆبانێ زیندوومابوون، دەکاتە قوربانی پلانەکانی دەوڵەتی ئەمەریکا، ئەو کات ئێمە وەک ئەنارکیستانی کوردییزمان هەوڵماندا ئەوە ڕۆشنبکیەنەوە، کە بەشداریکردنی پلانە سەربازییەکانی دەوڵەتی ئەمەریکا، سەرەنجامەکەی بەس بە کوشتدانی لاوانی ئازادیخواز و خۆلاوازکردن و لەبارکردنی زەمینەی داگیرکردنی ڕۆژاوا دەبێت چ لەلایەن دەوڵەتی تورکیە، چ گەڕانەوەی لەشکری دەوڵەتی سوریە.

ئێستا ئیدی هیچ شتێک ناڕۆشن و مایەی گومان نییە، وەک ساڵی 1975 دەوڵەتی ئەمەریکا لە سەرانی بزووتنەوەی چەکداریی کوردایەتی و شای ئێران هاوپەیمانی ئەو کاتەی، توانی ئەو بزوتنەوەیە چەکدارییە بۆ خزمەتی پلانە ئابووریی و ڕامیاریی و سەربازییەکانی خۆی بەکاربەرێ و لەنێوبەریت. پاش چل ساڵ دەکرا بە ئەزموونوەرگرتن خەڵک ڕووبەڕووی خۆکوژییەکی ئاوا نەکرێتەوە و بە هۆی وابەستەیی هاوپەیمانی دەوڵەتی ئەمەریکا ڕۆژاوا لاوازنەکرێت و بۆ لەشکرکێشیی ئەردۆگان زەمینە نەڕەخسێنێت.

ئێمە وەک ئەنارکیستان لە هەر کوێیەک بژین و بە هەر زمانێک بدوێین، هاوپشتیکردنی خەڵکی چەوساوەو و ژێردەست و جەنگزەدە بە ئەرکی خۆمان دەزانین، هاوپشتی لەتەک خەڵکی سڤیل و بزووتنەوە و ئاراستە ئازادیخواز و رزگاریخوازەکان، نەک پارتییەکان و دەسەڵاتداران و حکومەت و دەوڵەتان. ئێمە وەک سەکۆی (ئەنارکیستانی کوردییزمان) هەردەم بوونی پەیەدە و دەسەڵاتی بێچەندوچوونی پشتپەردەی ئەو پارتییە بە پاژنەی ئاشیلی کۆمەڵی ڕۆژاوا زانیوە و ڕەتکردووەتەوە بە دیاریکراوی لە کاتی ڕێکەوتننامە ڕسواکەی ئەو لە دهۆک لەتەک (پدک و پارتییەکانی ئەنەکەسە کە 40 کورسییان بە ئەنەکەسە بەخشین و بەخشینی کورسیی دەسەڵات بە ئەوان لە سەروویی بڕیاری خەڵک، هەروەها سازشی ئەوان لەتەك ئەسەد، گۆڕینی هێزەکانی یەپەگە و یەپەژە بە هیزێکی میلیشیای پەیەدە، کە پێشتر ئەوان هێزێكی خۆبەخشی بەرگریی کۆمۆنێتییەکان و لە کۆمۆنێتییەکانەوە ڕێکخرابوون، پاوانکردن و خۆزاڵکردن بەسەر بارودۆخ و ناوچەکە، شەڕکردن پەرەدان بە شەڕ و دەسەڵاتی پەیەدە، بەبێ گەڕانەوە بۆ بڕیاری خەڵک، ئەو کات لەسەر بنەمای ئەو شتانە زۆر بە ڕۆشنی ڕەخنەی خۆمان ئاراستەی هەبوونی (حزبی قائد) کرد و بە سەرەنجامبوونی ئەم ڕۆژەش ئاماژەمانداوە، کە وەک هەمیشە پارتییەکان بە خەون و ئامانجی بزووتنەوە جەماوەریی و کۆمەڵایەتییەکان بازرگانیدەکەن، ئێستاش دەڵێینەوە، تاکو خەڵکی ڕۆژاوا دەسەڵاتی بێچەندوچوونی پشتپەردەی پەیەدە و ڕێکخستنە حکومەتییەکەی پووچەڵنەکاتەوە، هەردەم ئەگەری گورگانخواردی هەیە، هەرچەندە درەنگ کەوتووە و کاتی جەنگە، بەڵام دەکرێت هەر ئێستا ئەنجوومەن و ڕێکخستنە جەماوەریی و کۆمەڵایەتییە سەربەخۆکان هەوڵی لەدەستگرتنی بەڕێوەبەردنی گوند و شارەکان بدەن و پاش شکاندن یان وەستاندنی هێرشی دەوڵەتی تورکیە، دەستی پەیەدە و سەرانی ئەو پارتییە وەک هەموو پارتییەکانی دیکە لە بەڕێوەبردنی کۆمەڵ کۆتابکەن و چیدیکە ڕێگەنەدەن، کە پارتییەکان بە چارەنووسی خەڵک گەمەبکەن و لە سەرووی خەڵکەوە هاوپەیمانی ببەستن و بە پارتییەکانی دیکە دەسەڵات ببەخشن.

دەکرێت و دەتوانرێت هەموو لایەنێك بە تایبەتی ڕۆژاوا ئەزموون وەربگرێت و چیدیکە بۆ پارتییە ڕامیارییەکان پەنانەبات و بە ئەوان متمانە نەبەخشێت و نەکەوێتە داوی گەمەی ڕامیاریی پارتییایەتی، کە هەمیشە خەڵک باجی ئەو گەمە ڕامیارییانە دەدات، زیانمەند دەبێت.

ئێستا کە ڕۆژاوا لەبەردەم هەڕەشەی لەشکری نیئۆئوسمانییەکان وەستاوە، ئێمە بە ئەرکی شۆڕشگەرانەی خۆمان دەزانین لە ڕۆژاوا وەک هەر کۆمەڵێکی دیکەی جیهان هاوپشتیبکەین، وەک ئەرکێکی ئەنارکیستیی خۆمان، نەک لەبەرئەوەی کە ئەوان وەک ئێمە بە زمانی کوردیی قسەدەکەن. ئێمە لە ڕۆژاوا بە هەموو پێکهاتە ئێتنیی و ئایینی و کولتوورییەکانی پشتیوانیدەکەین و بە هەموو شێوەیەک دژی هێرش و جەنگین چ هێرشی لەشکریی تورکیە بێت، یان ئاواژەگێڕیی دەسڵاتدارانی هەرێم لە ڕێگەی پارتییەکانی ئەنەکەسە و هێرشی لەشکری سوریە، یان هێرشی میلیشیا ناسیونالیست و ئیسلامییە عەرەبەکان بێت.

ئێمە خۆمان بە پشتیوانی بێچەندوچوونی گەلان و بزووتنەوە ئازادیخواز و ڕزگاریخوازەکانی سووریە هەین، ئێمە دژی جەنگین، چ جەنگی ئابووریی و ڕامیاریی و چ جەنگی سەربازیی، ئێمە دژی کوشتن و تیرۆر هەین و جەنگ و تیرۆر بە دیاردەی جیانەکراوەی سیستەمی چینایەتیی دەزانین.

ئێمە دژی هەموو سیستەمێکی ڕامیاریی و بەڕێوەبردنێکی سەروو خەڵکی هەین، چونکە ئێمە دژی سەروەریی چینایەتیین بە هەموو ناو و ڕەنگ و شێوەکانییەوە.

ئەڵتەرناتیڤی ئێمە خۆبەڕێوەبەری کۆمەڵایەتیی کۆمەڵەکانە بەبێ هەبوونی پارتییەکان و بەبێ پێکهاتە نێوەندگەرا و قووچکەییەکان. ئێمە هەوڵەکانی ئەردۆگان و هاوپەیمانانی ئەو ڕسوادەکەین و سات بە سات دڵمان لەتەک دڵی دانیشتووانی کانتۆنەکانی ڕۆژاوا لێدەدات.

نا بۆ دەوڵەت و پارتییایەتی و لەشکر و جەنگ و تیرۆر و کوشتار

بەڵێ بۆ ئازادی و یەکسانی و دادپەروەریی کۆمەڵایەتیی

بەرەو خۆبەڕێوەبەریی کۆمەڵایەتیی گشت کۆمەڵەکانی جیهان

سەکۆی ئەنارکیستانی کوردییزمان (کاف)

٠٨ی ئۆکتۆبەری 2019

h ttps://anarkistan.com

https://facebook.com/sekoy.anarkistan

https://twitter.com/anarkistan

anarkistan@riseup.net

 

وەڵامێک بنووسە

Fill in your details below or click an icon to log in:

WordPress.com Logo

You are commenting using your WordPress.com account. Log Out /  گۆڕین )

Google photo

You are commenting using your Google account. Log Out /  گۆڕین )

Twitter picture

You are commenting using your Twitter account. Log Out /  گۆڕین )

Facebook photo

You are commenting using your Facebook account. Log Out /  گۆڕین )

Connecting to %s

This site uses Akismet to reduce spam. Learn how your comment data is processed.